Frétt

06. 09 2002

Blóðsöfnunarbíllinn kominn


Rauði kross Íslands afhenti Blóðbankanum í dag, föstudag 6. september 2002, fullkominn blóðsöfnunarbíl, eins konar blóðbanka á hjólum, sem mun stórauka öryggi þeirra sem þurfa á blóðgjöf að halda hér á landi og styrkja starf Blóðbankans í þágu heilbrigðisþjónustunnar og almennings.

Blóðsöfnunarbíllinn er 13,5 metra langur og búinn öllum nauðsynlegum tækjum til blóðtöku og getur tekið á móti 50 til 100 blóðgjöfum á venjulegum vinnudegi – og jafnvel fleirum í neyðartilvikum.

"Með þessari gjöf vill Rauði krossinn tryggja öryggi þeirra sem þurfa á blóðgjöf að halda á spítölum landsins og einnig búa í haginn ef sú staða skyldi koma upp að safna þurfi miklu magni af blóði einhvers staðar á landinu í skyndingu, til dæmis í tengslum við stórslys eða náttúruhamfarir," segir Úlfar Hauksson formaður Rauða kross Íslands.

Að meðaltali gefa um 70 manns á dag blóð í Blóðbankanum við Barónsstíg, sem útvegar sjúkrahúsum landsins 14 þúsund einingar af rauðkornaþykknum á ári. Sjálfboðastarf blóðgjafa á Íslandi er forsenda þess að ætíð sé nóg af blóði til aðgerða á sjúkrastofnunum.

"Blóðsöfnunarbíllinn markar þáttaskil í sögu blóðbankaþjónustu á Íslandi," segir Sveinn Guðmundsson framkvæmdastjóri Blóðbankans. "Á næstu árum er mikilvægt að Blóðbankinn geti nálgast blóðgjafa nálægt starfi þeirra og námi, auk þess að geta safnað blóði með öflugri hætti í byggðarlögum í næsta nágrenni höfuðborgarsvæðisins."

Rekstur þessa blóðbanka á hjólum er alfarið í höndum Blóðbankans og Landspítala - háskólasjúkrahúss, en gert er ráð fyrir að deildir Rauða kross Íslands aðstoði við blóðsafnanir líkt og hingað til.

Víða um heim rekur Rauði krossinn blóðbanka og talið er að um þriðjungur blóðs sem safnað er á heimsvísu komi beint frá Rauða krossinum og annar þriðjungur frá blóðbönkum sem Rauði krossinn styður á einhvern hátt.

Nýja tækið er að grunni til Scania langferðabifreið sem er sérsmíðuð og útbúin af finnska fyrirtækinu Kiitokuori og fengið hingað til lands í gegnum Heklu hf í kjölfar útboðs.

Blóðsöfnunarbíllinn kostar um 30 milljónir króna hingað kominn. Rauði kross Íslands hefur verið að leggja til hliðar fé til kaups á bílnum síðan 1996. Fjármögnun var endanlega tryggð með fimm milljóna króna framlagi frá ríkisstjórninni seint á síðasta ári.

Ávarp Sveins Guðmundssonar yfirlæknis Blóðbankans
þegar hann tók við lyklunum af nýja Blóðsöfnunarbílnum.



Blóðsöfnunarbíllinn var afhentur hjá höfuðstöðvum Rauða kross Íslands við Efstaleiti
að viðstöddum fjölda gesta.





Úlfar Hauksson formaður Rauða kross Íslands afhenti Sveini Guðmundssyni
yfirlækni Blóðbankans lyklana að bílnum.





Að afhendingu lokinni settist stjórnarformaður Blóðbankans, Friðrik Pálsson, undir stýri og
ók nýja bílnum niður í Blóðbanka.





Starfsmenn Blóðbankans biðu á tröppunum eftir nýja bílnum og fögnuðu mikilvægu tæki
til að auka og bæta þjónustuna. Stjórnarformaðurinn/Bílstjórinn ávarpaði starfsmenn
áður en hann sté frá borði.





Og þá var komið að því að starfsmennirnar gætu skoðað bílinn og "prófað" búnaðinn.





Það er óhætt að segja að aðstaða í bílnum er öll ákaflega glæsileg.





Þetta er heldur enginn smábíll eins og sést vel þegar hann stendur í hlaði Blóðbankans,
enda er hann 4 metrar á hæð.

Til baka
Byggir á LiSA vefumsjónarkerfi frá Advania